الورشة

( أمال لو كنتى جميلة )
معقول يا فضيلة الشيخ ؟
معقول مالقتش وسيلة
غير اللوم والتوبيخ ؟

****فين التوجيه بالحسنى
فين القول المعروف
حز كلامك فى نفوسنا
بخروجه عن المألوف

****
ذنبها إيه المسكينة
هل علشان لابسة نقاب
تدبحها كدا بسكينة
تالمة قصاد الأغراب ؟!

****إزاى فضّلت يا شيخنا
الشكل على المضمون
اللى حصل – وقرا تاريخنا –
عمره لا كان ولا هايكون

****
دا فضيلتك مفروض إنك
قدوتنا دنيا ودين
بس اللى سمعناه منك
صعب نقول بعده آمين!

****
والأزهر كان طول عمره
منبر علم وتنوير
من يوم ما توليت أمره
اتغير حاله كتير !

****
اسمح لى أقول لفضيلتك
بصراحة  وع المكشوف
إن البنوتة دى بنتك
واحنا بنسمع ونشوف

****
وأكيد فيه ناس حوالينا
من أعداء الإسلام
بالخلافات مننا فينا
سعداء ، مش عايزة كلام !

****
راضى البنت بحنية
يا فضيلة الشيخ وهدوء
أصل حالتها النفسية
بصراحة فى غاية السوء !