الورشة

بينك
وما بين السكه اللى أنت عاوزها مسافه
وبحور
وطريق مش باين منه
غير عتمه ف عتمه
وأبالسه بتقفل باب الجنه
وتفتح باب النار
علشان تتدفه ف عز البرد
هاتغامر ؟
وتنط ف عز البرد
ف نص البحر
هاتغامر !
والضلمه بتقطع حبل خيالك
وبتطفي اللمبه اللى إنت شايفها ف آخر الشارع
...........
بينك
وما بين السكه اللى إنت عاوزها
كفاح
هاتكافح ؟
وتحاول توصل بين الضلمه وبين النور
إحسبها الأول
لا الحلم يشدّك
واللمبه اللى إنت شايفها
ف بؤرة نور
تتحول ...... لحجارة نار
ما تسيبش الحلم يسوقك
ها يحاول يرسم ف خيالك
أشجار وجناين وورود
وطريق مش باين آخره ف عز الظهر
ويقول لك دا طريق النور اللى إنت عرفته
ويقول لك على مجد وشهره وحاجه كبيره
مش ممكن هاتكون ف خيالك
هاتحاول تحلم !
على راحتك
بس إحسبها الأول
قبل الضلمه ما تسكن قلبك
وتنط ف عز البرد
نص البحر