السبيعى

السبيعي
د. رضا صالح

- يا دكتور يا دكتور..
كنت خارجا من العيادة ؛ فى طريقى إلى السيارة ، التفت لأرى صاحب الصوت الغليظ ؛ على وجهه ابتسامة واسعة؛ وقفت ..أخذنى بالأحضان
- ازيك يا دكتور ..نسيت أخوك السبيعى؟ إحنا مع بعض من زمان.. ابتدائي و اعدادى و ثانوى .. فاكر الأستاذ سمير عويضة مدرس الفرنساوى... كومان تابيل تو ؟ جى ما بيل سبيئى...
وضحك ضحكة مجلجلة بصوت أجش..
ابتسمت ؛ فتشجع وأكمل كلامه:
- يا سلام!! أيام !
- أهلا.. أهلا ..فرصة سعيدة ..
أحسست أننى تأخرت عن ميعاد المستشفى ، تمشينا سويا حتى وقفنا جوار السيارة تحت شجرة نبأ عتيقة داخل سور مجمع العيادات ..
نظر إلى وقال :
- على فكرة ، أنا با كتب شعر... شعر بالعروض زى الخليل بن أحمد ما قال ..
كتبت عن الزوجة ..والعاطفة ..
ابتسم قائلا :
- أنا عاطفى قوى ؛ لكن شكلى كده... إحنا كنا زملا ؛ لكن أنا دخلت معهد صحى ؛ معايا تخصص تحاليل بول وبراز ودم ؛ أسمع :
يا نبع الحياة والوئام المنزلى..
سألتك بالله بغير تطفل..
لم الجاعورة ؟ والأطفال تتململ .؟.
قلت له :
المدام نكدية؟
زاغت عيناه قائلا :
أبدا دى غلبانة جدا ...بس لسانها سليط ، أعوذ بالله من صنف الحريم ..
.....
أستأنف كلامه:
نعمل إيه يا دكتور ؟ نكتب شعر وقصص.. الهواية أحسن شىء فى الدنيا؛ أصل العيال كبرت ؛ عندى محمد محامى وأحمد محاسب والبنت فى الدبلوم ..لازم الواحد يمارس هوايته ..أنا أعرف انك أديب كبير( ضحكت )استأنف كلامه ؛ لا والله أنا قريت لك قصة فى مجلة مشهورة عن الإخوة اللى اختلفوا على الميراث.. الله يقطع الميراث وسنينه ؛ البيت بتاعنا عامل لنا مشاكل كبيرة... أخويا مش عاوز يشوفنا عشان ساكن بره البيت .
سألت :
- ليه ساكن بره البيت ؟
- الموجود 3 شقق وهو الأخ الرابع نعمل إيه ؟ آدى الله وآدى حكمته، والله العظيم أنا نفسى أسيب البيت ويسكن مكانى..
نظرت إلى الساعة فى يدى وقلت :
- أستأذن أنا ؛ فرصة سعيدة يا أستاذ سبيعى..
- فاكر عم أحمد بتاع البطاطا ؟ والشيخ رجب بتاع سندوتشات الفول والطعمية السخنة ؟ فى فسحة المدرسة ..يا سلام راحت فين الأيام دى ؟
- مش عارف..
نظر إلىّ مليا وقال بصوته الأجش :
- أنا مازلت أغنى فى الأفراح؛ لكن نشاطى الفنى قل ؛ موش زى زمان ؛ عند الحبايب فقط ..كل سنة وأنت طيب. فتحت باب السيارة ، وحاولت الدخول ،استأنف كلامه :
- كنت عاوز اسمّعك الشعر وأنا ملحنه ...
أنت ملحن كمان ؟
- أيوه ؛ أنا عندى عود من أيام المرحوم جدى ؛ عاوز أدندن ، وقال بصوت تخين أجش وقد اندمج تماما وأخذ نفسا عميقا وأغمض عينيه وبانت أسنانه صفراء داكنة من أثر النيكوتين والمعسل الذى يبدو أنه يلازمه بلا انقطاع ؛ رفع عقيرته :
- أطاوع فى هواك قلبى وأنسى الكل علشانك ..وأدوق المر فى حبى ..بكاس صدك وهجرانك ...
- يا سلام يا سلام ..
- لكن باين عليك مستعجل ، طب خد دى ...
- خليها يوم تانى
- كل سنة وانت طيب ، حا تدبح خروف العيد
- إن شاء الله...
- طب ماتنساس بيت الكلاوى والفروة
- حاضر ياعم ..
وانطلقت بالسيارة

د.رضا صالح
فبراير 2006

06/30/2007 - 23:12