الورشة

الطفل الساكن جوّايا
بيشعلل وقت الخوف
تفاريح
بيكسر كل البراويز
على باط الشارع
ويبيح
انه يغمس لقمة صدق
وبكل براءه
كان بيحايل خيط الشمس
الجاىّ يصادر ضلمة بكره
ولا كان يدرى
إن الغد الراقد
على عتب القلب
ذبيح
الطفل الساكن جوايا
بيحرجم على ضل البنت الساقطه
من طاقة الشهوه
فتافيت
ويعدّى من تحت السره
لأبعد شفه
على طرف البيت
ينزوى في الركن بآخر ضفه
ويشطشط ف الأود الضلمه
علب الكبريت
الطفل الساكن جوايا
ملهوش غير ايد
بيلم العالم قدامُه
يرسمه عناقيد
و مبين كراسة أحلامُه
يشخبطه ..
ويعيد
الطفل السكن جوّايا
مهو أصله عنيد
بيدمر كل الحلم ف لحظه
حين م بيصحى
على فجر جديد