الورشة

تصور لما بتقعد عاقل جدا
وكل ما بتتوقع شيء بالضبط بيحصل
وكل ما بتخاف من شيء تروح باعد عنه
فيتاكد لك انك صح
ساعتها بتعرف انك واقعى
يجوز؟
او عقلانى؟
او خدك خد ع اللطم كتير
فمن السهل تعرف ايه الجاى
وخصوصا ان الايام
على نفس الصوره المحصوره
بين انت مركز للدايره
وشويه حاجات حواليك عماله تدور
وبنفس طريقتها البايته الباهته
نهار ف ليل
وليل ف نهار
مش دى القضيه
القضيه
انك مش عارف
تندم على شيء
او تبكى
او تستنى
او تحزن لما يموت منك شيء
رغم انك كل يوم
بتموت فيك اشياء
فتروح ببساطه
راكنها جنب الحيط
وبنظره عديمة اللون...
دنيا...
نفسى امسك فيك واضرب اضرب
يمكن تصحى
او يمكن تتهز وتزعل
ازعل
حاول تزعل
اندم احزن
حاول تانى تطير
نادى عليك
حب
اكره
حاول تستنى فى شيء
قربت بجد تموت