You are here
بيت
بيت
سيدة فاروق
بيت
خير
اللهم اجعله خير
- مش حلم
لما صحيت م النوم
لقيتنى نايمه ف الخلا
قبل ما اقوم م النوم
كان فيه أهل وعِشره
وعَشره أصحاب
كان فيه بيت واخوات
كان له باب يقفله أبويا علينا
لما ننام
كان فيه سرير بمخده
أدفن راسى عليها لما البرد يسقَّع ودنى
فادفا
كان فيه مصطبه حيه
ترحب بيَّ أنا واصحابى للفجريه
نضفر كل سهارى الكون ف عينها
كان ليَّ جيران
كان بيتنا كبير
وصغير
يجمعنا أبويا ف الأعياد
ف يساعنا كلنا
وولاد اخواتى يحْبوا من حوالينا
ويَّا النسمه الخضره
كان باب بيتنا طول اليوم مفتوح
رجلين داخله
ورجلين خارجه
وآخر الليل
يقفله أبويا علينا
فيضيق البيت
يحضنا
ننام ف سلام
* * *
لما صحيت م النوم
ملقتشى غيرشى صره م الهدوم
والاورقات
ورق تذاكر للسفر
فرعين نبات متحنطين داخل كتاب
ومسوسين
كأنهم من ألف عام
لقيت
حبة صور ما اعرف لمين
غير انى كنت واحده من ضمن أشخاص الصور
والباقى أنا ما عرفتهمش
مكتوب على ضهر الصور فرح اختك فلانه
عيد ميلاد صغيرها
صوره تانيه مكتوب عليها اسم ابويا
وشماله أمى واقفين ورايا
كلهم ما عرفتهمش
ولا عرفونيش
الملامح ساقعه
العينين
لون الفراغ
أشقشت كل الأورقات
والهدمتين ويا الصور
فردت كعبى ناحية اليافطه البعيده
مكتوب عليها اسم شارع زى اسم فوق بطاقتى
الشارع طويل
وواسع
ولا فيه بيوت
ولا حتى طوب مكان حيطان
كانت زمان واقفه هنا
ريحة الأرض غريبه
لونها بلون الموت
رجعت
مكان ما صحيت
حطيت صرة هدومى
* * *
نمت
صحيت
نفس الشارع
نفس الشارع
الطويل
الوسيع
الفراااغ
نفس الـ...
حروف غريبه
ما فهمتهاش
كل اللى مستخبى جو راسى
حنين
مضفر بخوف
وكلمه
وشوية حروف
ليه ولمين
وايه
وايه هو السبب
ويعنى ايه كلمة سبب ؟
* * *
نا
هو
اللى
؟
وللا
همه
اللى ؟؟؟
يعنى ايه ؟؟؟؟
12/03/2008 - 20:47
القسم:
اقرأ أيضا للكاتب:
بحث
المتصفحون حالياً
يوجد الأن 0 عضو يتصفحون الموقع
أحدث التعليقات
-
حلم الطفلقص مؤثر جدا ،يمس الروح ،ولكنه - نهى رجب
-
بتجرّب تانى تموتمعزوفة شعرية عذبة، موجعة - نهى رجب
-
شريطة حمراءجميل ونافذ كالمعتاد يا وفائي - سلمي عمارة
-
شريطة حمراءكم أوحشني شعرك يا وفائي - أحمد يحيى
-
لماذا تبكى النساء...أ:سوزان خواتمي - نهى رجب
-
طيور الجنةنص قصصي محكم السرد فاجع في - نهى رجب
-
لص يوم السبتاختيار جميل لنص ثري ماتع في - نهى رجب
-
آدمفى الحقيقه انا كنت متوقفه عن - Amina Hassan
-
قطّة على السُّلَّمممتنة لكم كثيرا مروركم الكريم - نهى رجب
-
آدمأمينة... سعيد بأنك هنا... - أحمد يحيى
التعليقات
ياحبيبة .. ( قلب ) .. مامــا
إنتي رايحة .. بمامــا .. فين ؟
ولا واخده .. الشعــــر .. فين ؟
ولا واخدك .. هــــــوّه .. فين ؟
ليه بقيت بااقرا ..
ف حروفك .. ألف .. آهـــــــــه
مكتوميــن
والكلام .. بقي .. شـــــــــــاب
شايب
عجـّل .. ( الشيبة )
بسنين ؟!
والمعاني .. طفلة .. ( تاهت )
وسط سوق
النخاسين
و ( العجوزة ) .. اللي ف آهاتك
كان طبيعي .. أسأل
منين ؟؟؟
ليه بشوفها ( لبـــــــــدّة ) فيكي
كل مااقرا ..
كلمتين ؟!!
ساكنة بين ( حرفــــــك ) وبينك
حتي .. بين
النقطتين ؟!!
........
والصـــــــــــور عمّاله تجري
من شمالك لليمين
كلهم .. ناسك .. وأهــــــــــلك
إيه ( سخطهم )
مجهولين ؟!!
حتي أبوكــــــي .. حتي أمــــك
حتي .. كل
الطيبين !!!
كلهم .. من ألف عام ؟!!
متحنطنين ..
ومسوسين !!!
.........
وأبتديت .. ( أقراكي ) .. تاني
لا جل ( مااعـــــــــــــرف )
( بنتـــــــي )
فين ؟
وألقتيت ( بنتي ) الحبيبة
لســّه .. ف الحصن
الآمين
حصن ( إبداعهـــــا ) اللي
أكد .. رفعهـــــــــا
فـــــــــوق
الجبين
....
بنتي .. مش ( بنت )
الحكاية
بنتي ( شاعــــــــرة )
بالأنين
جايه .. ( بالبيـــــت )
( الحداثي )
وبحروف
متغربين
تحكي .. عن ( بتنـا )
المهدّم
عن .. ولاد ( متشتتين)
كلهم ..
قطعوا التذاكر
بس .. مش عارفيـــــن
لفين ؟!!
كلهم .. تاهوا وضاعوا
بعد .. تشتيت
اليقين ؟؟؟
........
ياحبيبة ( قلب ) ماما
قلبي .. نازف
حسرتين
لأ مكنش .. الحلم خير
دا احنا .. مُتنا
مرتين
مرّه .. لما سيبنــــــا
(( بتنــــــا ))
ينهبــــــــــــــوه
المفسدين
مره .. تانيه .. لمـّــّا
( نصك )
قال عليهــــــــــــــــا
( هيه )
مين ؟!!!
..........
ياحبيبة ( قلب ) ماما
شفتي .. رحتي
بماما
فين
؟!!!
.............
سيدة فاروق .. حباً لشخصك .. وتقديراً لإبداعك
سجلت ( بإسمك هنا ) بكل فخر وإعتزاز وتقدير
أول
( تجرية لرؤية تحليلية .. شعــــــــرية / تقديرا لنصك الشعري .. الذي ألهمني بها )
ماما
زينات القليوبي
لقيتنى نايمه ف الخلا
قبل ما اقوم م النوم
كان فيه أهل وعِشره
وعَشره أصحاب
قبل ماتعرفنا ان ده كان حلم هى قالت انه مش حلم او حلم
يمكن عايزه تلخبطنا شويه ويمكن عايزه تعمل مزج بين الواقع والخيالى عشانى ماتعرفش منهم بالظبط تصدق مين وتكدب مين
المهم ان فى الاتنين طعم الاغتراااااااااب باين قوى
وطعم الوجع باين قوى
ياسلام ياسيده لسه عايزه تخلى ف عنينا دموع رغم ما جمعناه من دموع
اقولك
تحياتى
محمد حسنى