الورشة

لما الشجر بيفر من توبه
والشرخ يظهر فى الطريق
جرحي القديم ينزف حدود
يملاني حد الملتقى مني
يكسي المرايا الصامته سنوات
لسه الأغاني الحزينه بتخش فى قلبي
وهانى صاحبي بيسرق الكبريت
شغل اليوميه بيتعب الأبدان
حتى البنات بنفس اللذه حبيتهم
لكن بنات مطروح
نفس الفرح فى الروح
نفس الكلام والهمس
ونفس نور الشمس
حتى تراب السكك ..مدفن دموع العين
يحكيلي هم البراح
وحتى شوقي للشاعر المجهول
والصاحب اللي انكوى بفراقه
..يا صحابي ما بنساش
لسه السطوح فى العزبه ما بتعلاش
حافظه خطاوي الخاطيه والخاطي
ما تبوح بسر الحرامي والمجرم الواطي
---نفس البلل م الطل ع الأشجار
نفس احساسي القديم بالناس
--صوت ميتيين فى الراديوهات
نفس البلاد والشعب
هى الأراده الضعيفه
هو الضلام الغميق
هى الهروب المطاطي
هو الوجع فى القلب
... عارفك يا بكره اللي جاي
مهما تغيب الشمس
كل الليالي الرحيمه بتنتهي بصباح
ياما نفسي انزع ليله ..واحضنها
حاسس بطعم الليل الناعم الهفهاف
مع اني بأكره ذنوب الخلق
وذنوبي
مع اني بأكره ذنوب الخلق وذنوبي