الورشة

حلفتك يا حبيبي
لا تنسى يا حبيبي
لما بتسمع هالغنية
فكر فيّه
يا يا حبيبي
...
حاجات ما تتنسيش

إعداد الورشة

على اسم مصر
صلاح جاهين

على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكة الأرض شرق وغرب
وبحبها وهي مرمية جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
على اسم مصر
أنا اللي اسمي حتحـور .. أنا بنت رع
مثـال الأمـومـة ورمـز الحـنـان
تفـيض حـلمـاتي وتمـلا الـتـرع
وتسـقـي البـشـر كلهـم والغـيـطان
نهايته يا مصر اللي كانت أصبحت وخلاص
تمثال بديع وانفه في الطين غاص
وناس من البدو شدوا عليه حبال الخيش
والقرص رع العظيم بقى صاج خبيز للعيش
وساق محارب قديم مبتورة ف أبو قرقاص
ما تعرف اللي بترها سيف والا رصاص
والا الخراب اللي صاب عقل البلد بالطيش
قال ابن خلدون أمم متفسخة تعيش ليش
وحصان صهل صحى جميع الجيش
على اسم مصر
النخل في العالي والنيل ماشي طوالي
معكوسة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولدت من جديد
على اسم مصر
مصر .. التلات أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
أسمعها مهموسة والا أسمعها مشخوطة
شبكة رادار قلبي جوه ضلوعي مضبوطة
على اسم مصر
وترن من تاني نفس النبرة في وداني
ومؤشر الفرحة يتحرك في وجداني
وأغاني واحشاني باتذكرها ما لهاش عد
فيه شيء حصل أو بيحصل أو حيحصل جد
أو ربما الأمر حالة وجد واخداني
انا اللي ياما الهوى جابني ووداني
وكلام على لساني جاني لابد أقوله لحد
القمح ليه اسمه قمح اليوم وأمس وغد
ومصر يحرم عليها .. والجدال يشتد
على اسم مصر

الريل وحمد
مظفر النواب


مرينه بيكم حمد
واحنا بقطار الليل
واسمعنا دق اقهوة
شمينا ريحة هيل
يا ريل صيح بقهر
صيحة عشق
يا ريل
هودر هواهم ولك
حدر السنابل كطة

يا بو محابس شذر يلشاد خزامات
يا ريل بالله بغنج
من تجزي بأم شامات
و لا تمشي مشية هجر
قلبي بعد ما مات
وهودر هواهم ولك
حدر السنابل كطة

جيزي المحطة
بحزن...
وونين.. يفراكين
ما ونسونه , ابعشكهم
مو عيب تتونسين؟
يا ريل جيم حزن
اهل الهوى ..امجيمين
وهودر هواهم , ولك
حدر السنابل كطة

يا ريل طلعوا دغش
والعشق جذابي
دك بيه كل العمر
ما يطفه عطابي
نتوالف ويه الدرب
وترابك ترابي
وهودر هواهم ولك
حدر السنابل كطه

آنا اريد الوك لحمد
ما الوك انا لغيرة
يجفلني برد الصبح
وتلجلج الليرة
يا ريل بأول زغرنه
لعبنه طفيرة
وهودر هواهم ولك
حدر السنابل كطة

يبقى مظفر النواب شاعراً ورمزاً شامخاً من رموز هذا الوطن ونخلة باسقة في سماء الرافدين الزاخرة بكل المواهب والطاقات الخلاقة التي رفدت الثقافة والفن والموسيقى بأعظم الابداعات لقد كتب النوّاب القصيدة الفصحى بشقيها العمودي والحر كما نظم الشعر الشعبي وأبدع ايمّا أبداع في المجالين.
وقصيدة (الريل وحمد) تعد من اشهر قصائده الشعبية التي كتبها في الستينات من القرن المنصرم، ولم تكن القصيدة اساساً قد أعدت كي تغنى ولكن جمالية النص والمضامين الفكرية التي يحملها هي التي اثارت انتباه كل من الملحن المبدع ذي الروح العراقية الصميمة (محمد جواد اموري) والمطرب الكبير (ياس خضر) فأجتمع هذا الثلاثي العملاق فأخرجوا فسفيساء عراقية نبعت من ارض العراق المبارك، فكانت الولادة لهذه الاغنية المتميزة ومما يجدر ذكره ان عنوان الاغنية تغير الى (مرينا بيكم حمد) بالاتفاق مع الشاعر ولم يغني ياس القصيدة كاملة كون بعض مقاطعها تم حذفها بمقص الرقيب.
و(الريل) في لهجة الجنوب يعني القطار و(الكطا) هو طائر القطا...
واليكم النص المغنى من القصيدة:ـ
مرينه بيكم حمد واحنه أبقطار الليل
واسمعنا دطك أطهوه...
وشيمنة ريحة هيل
ياريل..
صيح بقهر..
صيحة عشط ياريل...
هودر هواهم ولك..
حدر السنابل كطا..
ياريل..
طلعوا دغش والعشك جذابي
دك بيه كل العمر مايطفى عطابي
نتوالف ويه وترابك ترابي
هودر هواهم ولك حدر السنابل كطا..
انه أرد الوك الحمد..مالوكن لغيره..
يجفلني برد الصبح وتلجلج الليرة
ياريل بأول صغر لعبنه طفيره
هودر هواهم ولك حدر السنابل كطا.

الجغرافيا الطبية
بهاء جاهين

بسيطة!
أمسح شجاك من ع الخريطة
بصاروخ موجه للقلوب العبيطة

بسيطة جدا!
كل الأماني علي امتداد البسيطة
أورام..
دواها صاروخ ذكي
مظبوط علي الأوجاع بتظبيطة
وإذا ابتدينا نقول
الكلمة ننطقها تزول علي طول..
مدن حزينة باسمها..

مش قلت لك حزنك بدائي جهول
ومالوش دوا
إلا بسر التكنولوجيا الغويطة
إلا بزر التكنولوجيا المهول؟

بمسح ذري للخلايا النشيطة
سرطانك المجرم خلاص مش غول
قطة أليفة.. قطيطة
تلحس في جير الحيطة
وترتعش في فروها المبلول

*****

نزل المطر كل نقطة مصوبة بإلهام
نام في سلام
وسيب علينا الانتقام
نشفيك من الجرب اللي صاب النهر
نشفيك من الغل اللي في الآكام..
كبر الجبال الأليطة..
وهمهمات اليمام

إديني أول حرف من أي إسم
أفني اللغات وكُتبها، حتي الكلام
عيّان يا عيني بكافة الأوهام..
بتاريخ من الفروسية والإجرام
أشعار صعاليك الآداب اللقيطة

بدال ما تدخل معهد الأورام
أدخل معانا ف حلف
واحلف: برئت من النخيل والحمام
من الرغيف والسميطة
والدقة والأحلام
من الربابة وملحمات زمبليطة
ودخلت في حلف الوئام التام
مخلوق وديع ع الدوام
وخُد دواك بانتظام
كوبالت يمسح البلاد المحيطة
وح ييجي دورك تتمسح
وتنام

*****

مش قلت لك دية عذابك بسيطة

____________________
بهاء جاهين - من ديوان "الارتفاع المسموح متر"

الله يجازيك يا عم عبدالناصر
عبدالرحمن الأبنودي

الله يجازيك يا عم عبدالناصر
الليل مليّل
والألم عاصر
لسه اللي بيبيع أمته كسبان
وكل يوم
أطلع أنا الخاسر
******
أما انت خميت مصر دي خمة
يوم ما ناديت بالعشق للأمة
ورطتنا نعشق خريطة عبيطة
وبشر ما نعرفهاش
وبلاد.. ما بنزورهاش
إلا.. فواعلية وبنايين وسواقين
وخدامين.. وطباخين.. وكناسين
بلاد أسافرها سعيد
ارجع حزين
حبيتها زي ما قلت لي.. واكتر
ع الأجنبي ما استكترتش عليا تستكتر
ع الأجنبي ما اتنقورتْش عليا تتنقور.
تطمع في دمعي
وف تعاسة راتبي.
مُلهم أنا.. واعمل غبي
وادي الألم يا عم عبدالناصر
زاحف وبيحاصر
وآدي الجميع خاسر
وآدي فجر أمتنا الجميل مغلوب
وآدي انتحار الأمة بالمقلوب
وأنا... غريب الدار..
لابسني توب العار
ساكن في وطني بالإيجار
***
قاعد أنا ع الجسر في القيَّالة
من قلب اللهيب مِنشالة
وقلبي.. ساقية حزن سَيالة
باغني..
ما اعرف مغني والاّ عديد
زي افتكار الميتين.. في العيد.
باعاني وحداني
شياطيني لابساني
والأمة قدامي.. مفارقاني
يا رب...
ما تحببني في الناس الملاح تاني
يا رب
ما ترجعني أعشق
ضحكة اخواني
يا رب
كرهني في أوطاني
***
ما أخيبك أمَّة
ما أتعسك أمة
لا عقل... ولا همة...
لا مصدقه فعلك
ولا تحفظي كلمة.
أمة.. تدور وتلف..
تقيلة.. مش حتخف
حماسية... وحماسها
بكتيرُه ساعة.. يجف.
أمة بتتخابِط
أمة بتتعابط
أمة ومالهاش
لا زابط ولا رابط
ولا كبير عيلة
ولا قرابةْ دم
وفكرة وهمية
ما تورث إلاّ الهمّ...
ما تحل عني يا عم..
إحنا ورثنا كلام
إحنا تاريخنا كلام
علشان كده لما تقول..
علي طول أقول:
وبكام؟؟
ما هو حب؟؟ دبرني
وتاريخ؟.. فكرني
وطريق؟.. نورني
ومصير؟.. بصرني
ده انا بقيت عربي
من قبل ما القي
اللي يمصرني.
أنا انتمائي لأمتي...
ممسخرني.
محسوبة في الأحزان عليّ
في الفرح تنكرني
ياللي انتي لا أمة
ولا انتي أم..
فيه أم
ما تعرفش ساعة الألم..
تضم؟..
****
قد ما ننورها
هيه مضلمة
قد ما نعلمها..
مش متعلمة.
كل ليلة بايتة مظلومة
وهيه الظالمة!!
آخرة السكك الوعار
مجد.. متلطخ.. بعار.
قد ما نحجمها...
تفلت م الإطار!!
السلاح من صنع بره
والكلام من صنع بره
المآكل
الملابس
والهوا البارد في بيتي..
صنع بره.
لا نسجْت الهدمة..
لا زرعْت.. ولا اكتفيت
شفتها.. جريت اشتريت.
جلاّبيتي.. عمامتي.. سجادتي
وحواديت الصغار
والحلاوة: حلوة.. مرة
شغل بره.
إيه يهم
إن مت من أجل البشر
ولا سبت الديب يصرَّخ
واتغابيت؟...
أو نسيتها؟ أو اتناسيت؟؟..
الشهادة مجانية...
والبطولات...
نفحات استعراضية
والليل مليّل
والألم... عاصر
لسه اللي بيبيع أمته
كسبان..
وكل يوم..
أطلع أنا الخاسر...
الله يجازيك
يا عم عبدالناصر!!

حاتجن ياريت يااخوانا مارحتش لندن ولا باريز
بيرم التونسي

حاتجن ياريت يااخوانا مارحتش لندن ولا باريــــــــــــــــز
دي بلاد تمدين ونضافه وذوق ولطافه وحاجه تغيــــــــظ

ملاقيتش جدع متعافي وماشي حافي وماشي يقشر خص
ولا شحط مشمرخ افندي معاه عود خِلفَه ونازل مــــــــص
ولا لب اسمر وسوداني وحمص وانزل ياتقزقيـــــــــــــــز
حاتجن ياريت يا اخوانا مارحتش لندن ولا باريــــــــــــــــز

ولا عركه في نص الليل دايره بالحيل وساحبها بوليــــس
قدامها جدع متجرجر وشه معور قال دا عريــــــــــــــــس
الخلق ماهي بتتجوز واشمعني احنا مفيش تمييــــــــــز
حاتجن ياريت ياخونا مارحتش لندن ولا باريــــــــــــــــز

ولا واحده في وش الفجر تبرطع ماليا الدنيا صــــــــوات
قال ايه جوز خالتي ام احمد سلفة اخوها السيد مـــــات
سبحانك ماعظم شانك والله الموت ده مفيد ولذيـــــــــــذ
حاتجن ياريت يااخونا مارحتش لندن ولا باريـــــــــــــــز

ولا واحد طالع يجري وواحد تاني بيجـــــــــــري وراه
ويقوله هاهع حصلتك يابن اللي ابصر ايه عامــــــــــلاه
لا الشارع غيط يا اخونا ولا احنا بدارة ولا احنا معيـــــز
حاتجن ياريت يااخوانا ما رحتش لندن ولا باريـــــــــــــز

ولا واحد بيبيع حاجه يقول بريال وتاخدها بصـــــــاغ
يا اخوانا دي حته إبره تاخدها بدوشه وقلب دمـــــاغ
حلفان وعراك ومناهده ويمكن ضرب كفوف يا حفــيظ
حاتجن ياريت يا اخوانا ما رحتش لندن ولا باريـــــــــــز

ولا فيش ميت ألف صعيدي بتوع يانصيب هاجمين ولافيش
ميت ألف معوض داعش جاي معاه صندوق ورنيـــــــــــــش
والله كرهت القهوة وحرمت اقعد علي الأفاريـــــــــــــز
حاتجن ياريت يا اخونا ما رحتش لندن ولا باريـــــــــــــــز

ولاشفتش ده اللي بلاسه وده اللي بعمه وده بطربـــوش
ملابسنا يا ناس تشكيله تعد اصحابها مايتعــــــــــدوش
دول ناس كنا احسن منهم قول ومسيرنا باذن اللـــــــه
نبقي احسن منهم برضك بعد الدرس اللي اخدنـــــــــاه
والله ده عيب نتهجي دروس يا اساتذه علي التلامـــيذ
حاتجن ياريت يا اخونا ما رحتش لندن ولا باريـــــــــــــز

قالولي بتحب مصر ؟ فقلت مش عارف
تميم البرغوثي


" تميم الرغوثي " هو ابن الشاعر الفلسطيني "مريد البرغوثي ، ووالدته هي الكاتبة والروائية "رضوى عاشور" .

وقد نظم هذه القصيدة بعد أن تم نفيه من مصر إلى الأردن ، بعد مشاركته في عدة تظاهرات واحتجاجات ضد الاحتلال الأمريكي للعراق عام 2003 .

قالوا لي بتحب مصر فقلت مش عارف
المعنى كعبة وانا بوَفْد الحروف طايف
وألف مغزل قصايد في الإدين لافف
قالوا لي بتحب مصر فقلت مش عارف
أنا لما اشوف مصر ع الصفحة بكون خايف

ما يجيش في بالي هرم ما يجيش في بالي نيل
ما يجيش في بالي غيطان خضرا وشمس أصيل
ولا جزوع فلاحين لو يعدلوها تميل
حكم الليالي ياخدهم في الحصاد محاصيل
ويلبّسوهم فراعنة ساعة التمثيل
وساعة الجد فيه سخرة وإسماعيل

مايجيش في بالي عرابي ونظرته في الخيل
وسعد باشا وفريد وبقيّة التماثيل
ولا أم كلثوم في خِمسانها ولا المنديل
الصبح في التاكسي صوتها مبوظُّه التسجيل
مايجيش في بالي العبور وسفارة اسرائيل
ولا الحضارة اللي واجعة دماغنا جيل ورا جيل
قالوا لي بتحب مصر أخدني صمت طويل
وجت في بالي ابتسامة وانتهت بعويل

قالوا لي بتحب مصر فقلت مش عارف
لكني عارف بإني ابن رضوى عاشور
أمي اللي حَمْلَها ما ينحسب بشهور
الحب في قلبها والحرب خيط مضفور
تصبر على الشمس تبرد والنجوم تدفى
ولو تسابق زمنها تسبقه ويحفى
تكتب في كار الأمومة م الكتب ألفين
طفلة تحمّي الغزالة وتطعم العصفور
وتذنِّب الدهر لو يغلط بنظرة عين
وبنظرة أو طبطبة ترضى عليه فيدور

وأمي حافظة شوارع مصر بالسنتي
تقول لمصر يا حاجّة ترّد يا بنتي
تقول لها احكي لي فتقول ابدئي إنتِ

وأمي حافظة السِيَر أصل السِيَر كارها
تكتب بحبر الليالي تقوم تنوَّرْها
وتقول يا حاجة إذا ما فرحتِ وحزنتِ
وفين ما كنتِ أسجل ما أرى للناس
تفضل رسايل غرام للي يقدّرها

أمي وأبويا التقوا والحر للحرة
شاعر من الضفة برغوثي واسمه مريد
قالوا لها ده أجنبي، مايجوزش بالمرة
قالت لهم يا العبيد اللي ملوكها عبيد
من إمتى كانت رام الله من بلاد بره
يا ناس يا أهل البلد شارياه وشاريني
من يعترض ع المحبة لما ربّي يريد

كان الجواب ان واحد سافر اسرائيل
وانا أبويا قالوا له يلا ع الترحيل

دلوقت جه دوري لاجل بلادي تنفيني
وتشيِّب أمي في عشرينها وعشريني
يا أهل مصر قولوا لي بس كام مرة
هتعاقِبوها على حُبَّ الفلسطيني

قالوا لي بتحب مصر فقلت مش عارف

بحب أقعد على القهوة بدون أشغال
شيشة وزبادي ومناقشة في مآل الحال
وبصبصة ع البنات اللي قوامهم عال
لكن وشوشهم عماير هدها الزلزال
بحب لمعي وحلابِسَّة ومُحِّب جمال
أروح لهم عربية خابطة في تروللي
كإنها ورقِة مِسودّة مرميّة
جوّاها متشخبطة ومتكرمشة هيّه
أو شلّة الصوف، أو عقدة حسابيّة
سبعين مهندس ولا يقدر على حلي
فيجيبوا كل مفكّاتهم وصواميلهم
ويجرّبوا كل ألاعيبهم وتحاييلهم
ساعات كمان يغلطوا ويجربوا فيّ
بس الأكيد إنهم بيحاولوا في مشاكلي
وإنها دايماً أهون من مشاكلهم


أحب أقعد على القهوة مع القاعدين
وابص في وشوش بشر مش مخلوقين من طين
واحد كإنه تحتمس، يشرب القرفة
والتاني غلبان يلف اللقمة في الجرانين
والتالتة من بلكونتها تنادي الواد
والواد بيلعب وغالبهم ثلاثة اتنين
أتوبيس كإنه كوساية محشي بني آدمين
أقول بحكم القاموس، إن الهواء جماد
واشم ريحة شياط بس اللي شايفه رماد
عكازة الشيخ منين نابت عليها زناد
يسند على الناس ويعرج من شمال ليمين
والراديو جايب خبر م القدس أو بغداد

قالوا لي بتحب مصر فقلت مش عارف

قطر الندى قاعدة بتبيع فجل بالحزمة
أميرة عازز عليها تشحت اللقمة
عريانة ما سترها الا الضل والضلمة
والشعر الابيض يزيد حرمة على حرمة
والقلب قايد مداين زي فرشة نور
والفرشة واكلاها عتة والمداين بور
اللي يشوفها يقول صادقة حكاوي الجن
واللي يشوفها يقول كل الحقايق زور

عزيزة القوم عزيزة تشتغل في بيوت
عشر سنين عمرها لكن حلال ع الموت
صبية تمشي تقع ويقولوا حكم السن
وسِتّها شعرها أصفر وكلّه بُكَل
كإنها مربية فيه اربعين كتكوت
ووشها زي وش الحاكم العربي
كإن خالقها راسمها على نبوت
تحكم وقطر الندى تسمع لها وتئن
أصل البعيدة وليّة أمرها، عجبي
على الهوا بحجة الكسوة يقيموا له سور

أحكي يا قطر الندى ولاّ ما لوش لازمة
حكاية ابن الأصول تفضل معاه لازمة
فيه ناس بتلدغ وناس ليها البكا لازمة
ياللي سطلت الخليفة بجوز عينين وشعور
كنت سما للأغاني والأغاني طيور
مين اللي باعك، عدوك، بعض أولادك
مين اللي كانوا عبيدك صاروا أسيادك
مين اللي سمى السلاسل في إديك دِبَل
مين اللي خط الكتاب مين كانوا أشهادك
وازّاي متى سألوكِ "هل قبلتِ به"
سكتِّ ومشيتِ يا مولاتي في الزفة

لبنان وغزة وعراق فينا العدو تشفى
حطوا جثثنا يا حاجة تحت سجادك
ووقفت تستني خيط الدم يبقى بحور

قالوا لي بتحب مصر فقلت مش عارف
لا جيتها سايح ولاني أعمي مش شايف
بلد علمها انمزع والرفّا في المساجين
ومهر مربوط في كارو وباله في البساتين
وابو زيد سلامة على كرسي وكيس جلوكوز
لجنة مشايخ تناقش فتوة الأراجوز
سؤال نعيش أو نموت، فيه لا يجوز ويجوز

لو السقوف خايخة نسندها بحجارة وطوب
لكن ده لوح القزاز كله ضرب تشريخ
لو الولد حرف في الآية، ها يبقى يتوب
بس المصيبة إذا الآية اخترعها الشيخ

يا مصر كومة حروف إبر المعاني فين
إبر بتجرح إيدينا قبل ما بتبان
نسرك في بال السما بيقول حدودها منين
نسرك بياكله الصدا في بدلة السجان

يا قلعة السجن يا قلعة صلاح الدين
أنا بقولك وأهلي ع الكلام شاهدين
لو كنت حرة ما كناش نبقى محتلين

والناس شكاير صريخ رابطين عليها سكوت
آهات سَكوتَة كإن الأرض مستشفى
مطرودة منها الدكاترة ف سجن أو منفى
والناس بتسأل هنصبر ولاّ نتوفى
فيه ناس تقول زي بعضه دول نوعين م الصبر
وناس تقول زي بعضه دول نوعين م الموت
يا مصر بعض التسامح يبقى عار وبأجر
افتكري "لا تحسبّن" مكتوبة فوق كام قبر
والتار يبات يصحى تاني لو يشيب الدهر
والتار حصان غير لصاحبه ما يلين ضهر
والتار تار العرب وعشان كده تار مصر

قالوا لي بتحب مصر فقلت مش عارف
لا جيتها سايح ولاني أعمى مش شايف
ولاني هايف اردّ بخفّة وبسرعة
وكل من رد يا كذاب يا هايف

أصل المحبة بسيطة ومصر تركيبة
ومصر حلوة ومُرَّة وشِرْحة وكئيبة
دا نا اختصر منصب الشمس وأقول شمعة
ولا اختصر مصر وانده مصر يا حبيبة

يا أهل مصر اسمعوني واسمعو الباقيين
إن كنت انا رحّلوني كلنا راحلين
يا أهل مصر يا أصحابي يا نور العين
يا شنطة المدرسة يا دفتر العناوين
يا ضغطة البنت بالكراسة ع النهدين
ترقص قصاد المراية، واحنا مش شايفين
يا صحن سلطان حسن يا صحن كحك وتين
يا ألف مدنا وجرس، لألف ملّة ودين
يا أهل مصر اسمعوني، والكلام أمانات
قلتولي بتحب مصر فقلت مش عارف
روحوا اسألوا مصر هيّه عندها الإجابات

مواويل
فؤاد قاعود

داريت بكوخي رضوخي للسنين البور
وخلقت ويا المكان لغوة لسان وشعـور
وجعلت بالفكر مرتع بكر في المنظور
وصنعت والبدر غافي كل أطيافي
ولا كانش رغم انصرافي سمتكم خافي
أرسل شريط الرؤى في وحده موصوله
وتو ما اتفك مني يد مغلوله
أقطع بمقطع بيسطع من حروفه النور

***
لو غيتك شهرتك اعمل لها طبال
صوت الكفوف ع الدفوف يدوش لكين قتال
والشهره مهره حويطة تقلب المختال
تجمح وترمح وتقزح باللي راكبها
يا يطب للديل يا يطلع فوق مناكبها
تعاند اللي ركبها والغرور ساقه
وتصاحب اللي يلجمها بأخلاقه
والحر لجل الحقيقة يركب الأهوال !

***
جسدت قرع الطبول من همسة الأسياد
ونفذت للودن عنوة واقتحام وعناد
وانت برغم اللجاجة خلقة الحداد
يسير خلالك جميع ما يصدره مولاك
لا الكهربا تتكسف ولا تستحي الأسلاك
تجئر وتنهر وتجويفك فراغ وهباء
ولما زادت بفضلك قوة الضوضاء
تم اعتمادك لأعصاب البشر جلاد

فى الموت حنعيش
أمين حداد

أنا زعلان جداً جداً علشانك
يا ميت فى أوانك
قبل أدان الديك
أنا زعلان جداً جداً علشانى
مش راح أشوفك تانى
يا أعز صديق
و الناس فى الشارع ماشية
و ماهيش شايفة البنت الحافية
و بتبكى ورا الشبابيك
و محمد بيعيط زيك
كان قاعد يكتب نعيك
ابن فلان و فلانة
و جوز علانة
و أبو أبصر مين
و قريب و نسيب عائلات
أسماء عناوين
و ابنك واقف ياخد عزا والده
و الجرسون اللى بيعمل قهوة
عرقه مصفر ياقته
كله بياخد وقته
و أنت ماخدش وقت
قررت تموت
وقت ما أموت بالضبط
أنا و أنت صحاب و حبايب
من وقت الشِعر الخايب
و لحد الشَعر الشايب
من وقت الأوتوبيس اللى معدى و بيسلم
على أجزخانات و قهاوى و حنفية ميه
و بتوع فخار ، و مصاطب و أزيار
و صعايدة بيبعوا خيار
و كلوبات سهرانة
و الكشاكيل فى الأيد عرقانة
من وقت مصايف رأس البر و جمسة
و السهرة مع الطاولة هزار
و لحد ماشفنا ولادنا كبار
مش عارف أقولك حاجة
لكن أوعى تموت بسذاجة
احنا صحاب و حبايب
حنسيب الأرض
و لحد ما نوصل لسمانا
نمسك إيد بعض
و نودع قرآن معزانا
و نقول للناس الحزنانة
يمكن فى الموت .... حنعيش