الورشة

كان مجنون بالوطن المتسرسب من كل جيوب الفقرا
وجيوب الغربه المخرومه وبتنفد على أسفلت الدمعه
......... ............ .......... .............
كان عامل زى رياح امشير بيعفر لحظة ما أقول له
إن الدنيا أكيد هاتـحـن .. على الراكبين على طوقها
وإن الوطن ان تاه من قلبه الخط الواصل بينه وبينـا
أكيد هايشبِّه لما نقابله .. ويتذكر شئ من ملامحـنـا
ما احنا وشوشنا كمصريين ... مـنـحـوتـه وواضحه
كان يضحك جداً .. ويكركر زى ابريق الميه
ويقول لى :-
شاكك إنك شارب خمره ..!؟
ويعفرعلى قلبى بزعابيب الغضب الثاير بعد الضحكه
يسألنى :-
طيب ليه أنا وانت وملايين الناس نصاً .. تحت الجزمه
جزمة غربه .. جوا بلادنا وبره بلادنا .. وف أحـلامنا
****
ويفكرنى ..
فاكر آخر مره قعدنا هناك على كوم "الردفه"
ف "الدهبيه" جار الترعه ..
لما قريت لى قصيده حزينه كنت كاتبها
عن فلاح بيدادى الحزن بدمعه وغـنوه
غنوه صبحت هى جريمتـه ..
إللى راح مارجعش عشانها
يوم ظبطوه بيغنى لوطنه ف ليله كئيبه وشاتيه
غنوه بتشبه طعم المش ....... وصوت الساقيه
تعديدة نسوان الناحيه ................ فى مياتمنا
يوم كان واقف جنب الزير يحكى له مواجعـه
وكيف الزاد بيعز على الأولاد والهدمه الباليه
وابنه اللى أدى له سنين بين الضفف المعتقله
علشان بيواظب على صلواته.. ف مواعيدها
ولا عمره صلى العشا واتأخر بره ...
ولا جالس حد من الناس المشبوهه ..
بس الهوجه خدته ف اللمه
ويدور وشه لوشى متشال .. على رقـبة فجأه
والدمع بينضح من عينه.. مخـلـوط بالدهشه
يسألنى : -
قول انت ياشاعر بالذمه ..
ليه أزيز نفسك على وانتنى صوتك م الغصه ؟
****
تتخنق فيا الإجابه واموت ف جلدى يشب نوح قلبى فى لحظه
واحس بالجبل اللى مال فجأه كده على كتف بوح ماماتش لسه
ينطق " عاطف الشاذلى ":-
يقول يا " صفوت " حيلك الدنيا أمل ........... ودا مهما كنا
عايشين ولسه الخطوه ع الطريق بتجر خطوه
****
لاكان نبى ولا كان إمام لكنه كان إنسان وبيحاول يمر
من سكه شافها مضلمه .. ومافيشى ليها أى جسر
كان نفسه لما يموت .. يموت على صدرالولد فى أرض مصر
كان نفسه يتحرر من الذات الحزينه رغم إن حياته قهر
ومش شايف شعاع أمل .. شاقق عباية الليل مع أى فجر
لكنه كان فى بعض حين بيمِيل على سمعى يسرلى سر
.............. ........ ...........
بحلم أشوف تراب بلدى جدايل بنت تتغندر
وتيجى لحالها ف الصوره .. لما الدنيا تتصور
مافيش غريب يقدر يفكر يشتريها بمهر
****
شالت بلاد فى خطوته وحطت بلاد
وطاح بدنه النحيل وقع لما وقع ..صوته لبس توب الحداد
كان بيننا يومها ألف ميل لما صوته جه وداس فوق الزناد
زناد الحزن والتبريح .. وتهميش وجودنا فى كتاب البعاد
كان بيبكى زى طفل ممزوق الضلوع ، ومرغم ع الرقاد
أمه مش فاضيه تضمه لصدرها .. كان وحيد
والطريق محتاج لياما تأشيرات
قال ياصاحبى الموت قدر .. بس مشتاق للولاد
كان نفسى اشوفهم بس لا حليه ف إيد
فيها الإبر .. بتقاوح الموت ف الوريد
والموت مايعرفش المقاوحه والجدال .. ده أمر الشديد
وماعادش فيه حلم بوطن .. بيغازل الروح ف السكات
ولا حتى فى نطق الحروف .. والأغنيات
مش هانقدك بعد النهارده فاكتب الحلم البعيد
على شواشى النخل.. فى الوطن القعيد
ده لو قدرت تشوف عينيه قبل ما يحل الموات
أما أنا فماعادش فيه فايده أكيد ..
الروح مسافره للخلاص إدعيلها ترحل وسط عيد
وسمعت صوت .. من بعده صوت
وانقطع حبل الكلام بينا وخوفى أصبح أخطبوط
كلبش ف جسمى ولمنى ف كفه العنيد
مارضيش يسيبنى ..
أتخيل للحظه إن " صفوت " لم يموت
*****
ساعه وكان ...
" حسام "
مأكد إن قطر العمر بحاله فات
والولد ف الغربه مات ..
من ساعتها انا مستنى دورى
ف الرجوع أو ف الموات
زى حال كل باعهم الوطن .. من غير مزاد

هامش
بحاول افر م الأحزان ومش عارف
بحاول ادقق الأحلام ومش شايف
أنا م الموت مانيش خايف
لكنى بحلم إنى اموت لما أموت
فى حضن الوطن والوطن وارف