الورشة

دايما بحسّك بين خلايا الدم
بتزيحى عن روحى الوجع والهم
بتضمى قلبى برقة العشاق
وبتحضنينى بعنفوان الأم

ومهما يكون هغنّيلك
وألون لك مناديلك خضار (م ) النيل
وأقوم وأدعى ف آدان الفجر
وأقول يارب
توضع لى ف معالم سكتى قنديل
وأبوس الصبح لمّا ينام على حجرك
ويتدّارى فى هد الحيل
يا شمعة مونسّة حلمى فى عز الليل
وراسمالى طريق خلّى
وفارشالى السكك تلّى
يا كشفانى
يا حفضانى
يا أكتر منّى يا كلّى
وخيل مربوط وبيصلّى
وأنا وضلّى
بنتسلّى على الطرقات
وبحكيله وأجيب سيرتك
وحيرتك لمّا بتأخر على معادى
وشئ عادى أمّا ما يردش
وما يصدش
ويهرب منى فى العتمة
وشتمة خوف
بتطلع منى
غصبن عنى
مش دارى
ولا قارى
عن الضل أما يهجرنى ف غياب النور
وألفّ وأدور فى كراسى
عن ( الفاتحة ) وسورة ( الناس )
ومش حافض
وبتلخبط
فى آية ( الكرسى ) و ( الاخلاص )
ولا رافض
وجوايا أمل برضه انى أشوف ناسك
يا بدرانى على ضلوعك
ونبّت فيّا احساسك
وعششتيلى بقلوعك
لقيتنى
ف معبدك ناسك
وأجراسك وحراسك
حاجات فيّا
وأغنيّة
بحتة حزن جوّاها
يا محلاها
بتصدفنى
وتحدفنى
على آخر حدود الشوف
تبصّيلى
تحنّيلى
أجيلك وأكتب الواجب وأنا مكسوف
وتغصبنى إن أنا أتصعّب
وتتسحب
وتطلع من لسانى الآه
فتوجعنى وترفعنى
تعدّينى على بحرك
أدوق منّيه
وأقول ( الله )
وحبّة ولحنها يخلص
وأعود تانى
فيتجدد
وألاقى الغنوة وخدانى
ولمّا أتعب
بشدّ حبالى من حالى
وأحس ان أنتى أحلامى
وأحس أن انتى ترحالى
وتغريبتى وموالى
وخلخالى اللى بيغنى
ومهدى اللى اتفرد تحتى
وهدهد فيّا واشتالنى
وسمّعنى ( آيات قرآن ) وأنا صغيّر
يا قلب كبير
ومنّى لوحدى أنا بالذات ما يتغير
دا أنا (ف) نن العيون شلتك
وأنا نخلك وسنبلتك

يا رامية ف قلبى توحيدك
وزارعة ف جوفى بسملتك
وأنا اللى تمللى بستغرب
دا شئ أغرب
من اللى أنتى بتحكيلى عليه بالليل
وأنا بشرب معاكى الشاى
وكتر الويل على واحد
بيتهجى حروف إ.... ز.....ا...ى
وايه الحب دا يعنى
بكلم نفسى فى الضلمة
وخايف نفسى تسمعنى
لتمنعنى انى أحب أكتر
تقول ما أقدرش
ألاقى لسانى بيتمتم
وأقول هقدر
وأحبك ( حب مش ممكن )
ولا يمكن
يكون مفروض على قمرك ولا قميرى
ولا يعرف ولا يقدر
يحبه من البشر غيرى
يا دندنتى وتزميرى
وريش طيرى اللى بيضلل
على النخلة وعلى عيالها
يا مهرة جموح بتجرى ف حارة
جوّا اسطبل قلبى لوحده خيّالها
ولا مخلوق يقول مالها
ولا مخلوق يقول مكبوتة أو كابتة
يا نجمة هناك على آخر المدى ثابتة
أنا النبتة اللى حضنك قام ونبّتها
وأنا اللى عرفت نور الشمس فى عنيكى
ف حبيتها
وشدتها وخبيتها عشانك بس
سرقت خيوطها من بين العيال كلك
ما حدش حس
ما حدش شافنى اكمنّى
واكمنّى واكمنّى
وبهديكى الخيوط ديّة
عشان خاطرى اقبلى منّى
يا اسم جميل
تمللى بقوله كل صباح
وأعيش طول النهار مرتاح
يفرفطنى
كما العناقيد على جسمك
وينقشنى براءة طفل فوق رسمك
ما أنا يكفينى أبوس توبك
ويكفينى أقرا مكتوبك
ويكفينى انى أقوم الصبح
وأتوضى
وأقول اسمك