الورشة

دمعتين بمسافة عمرك وعمري

تلاگن علجفن من وشلت صبري

تلاكن وي فخاتيك ضوه ونشاب
.
من زرگن قصايد زرفن صدري


تلاگن والشعر ماينسمع بالصوت

مثل دمع اليتيم أعله الوجن يجري

يجفلن من تصيح بصفنة لتعبان

ويهذبن خيولك من تحت جمري

اذل عين التذل وابلع ضحكها اسيوف

واذبح كل غشيم الماعرف گدري

گمت بيك وشبخت اليركظ من النار

ومدخنه القصيده ونارك ابكتري

تلم روحك بچفك من تفيظ ارگاب

وتْغازل السيف ابنحرك ونحري

بس انا ورفيجي الفگس عين ابليس

واتمعچل رمش واتدندل ابگبري



مشيت او يالمحّنه ألهم خصر وحزام

ماخذ خنجري وظل خنجره أبخصري

مثل ضحچ الفجرمن يشگ وجه الليل.



اشگ وجه الامروز وأكشخ بنهري

يلشايل اغيومك والرموش چفوف

تمطر وين تمطر طينتك حري

عثگ برحي واطخ واتواضع أويه ألشيص

يابس بالنده وبالحَر ضحك تمري

ساكيت القصيده من الخيال ابحور

وتْلاگن ابسچة فجرك وفجري

وذوبت الرمح يوم الغلى الفولاذ

وبعته اعلع اليصبه اسيوف اذا تدري

سوالفهم جثث خرسه وتحاچي اشباح

وانه او يالخيال اتماطل ابصبري

ضحكه بلا ضرس تبلع وجه مخطوف

ودمعه بلا وجن وبلا جفن تجري

وحگگ من وگع معبرهم انمديت

وعبروا بالبواچي وسحگوا ابظهري