الورشة

لاتلتم ضوه بعيني وتغش الشوْف
مغشوش الذهب ومزيفه اللمعه
اشما تجلي بضواك الزيبگ يطش بيك
عليمن چا تهم وصاير تلمعه
تلتم ماي بارد وانا هودج نار
لاترشكني واطفه ولا الك رجعه
عرفتك من عفتني اتماطل اويسيوف
امطر دم عليك وشوچك اتزرعه
كل كطره بمصيبه وكل جرح جناز
مثل العشره اخوته وماتو ابجمعه
لادكيت بابي ولاگلتلي شبيك
وماظلت بواچي وهاي بس دمعه
ظمتهه الحنينه وفرهدتهه العين
ونذرت من تمر تتهدل امفرعه
من غص البحر واختنگ بيك وگام
شّرع جلده گلبي ويغرف بضلعه
من اخر جرف اسمع صليل الموت
وكل روجه اعله مرهف واطلب الفزعه
يبرج ظل سماك وتجدح بسيفين.
كل لوية احجاج اتلمك اللمعه
طبگت فوگ جفني الوحشه صافن بيك.
ياوجه الگباحه الترست الوسعه
خاويت الظلام ورافگيت الليل
ياليل الغريب الماالك رجعه
اركظ حيل اركظ واسرع شما بيك.
حته اتخف عليك الگاع بالسرعه
والحگ ياسهم اخر گلب جدام.
من صك السيوف مگبع ابدرعه
طبع الريح تصفن من يهيد الروج.
بس اشباط جاي وبيه الك رجعه
واتحزم رعيد اويه المطر والريح.
واصرخ حيل بيك واعتلگ شمعه
واتحاوط عليك شما بنيت اسوار.
بس انفخ تطيح وتوگع القلعه
اكشف للغدر وجهك تستر بيك..
ويطيح النگاب ولابد تنزعه
لميتك جمر بين الجفن والعين
كل صفنه بجحيم وكل دمع لسعه
تعال وارد اشوفك جم جرح مفتوح..
وچم سهم الغفه ومايقبل اتطلعه
وچم سهم البقه ومايقبل اتطلعه
البرعم لو يشك جلد الشجر ويصيح
الا من الخواصر برعمه ايطلعه
خل ابني اعله جرحي وخله سهمك بيه
يغفه ومن يفز يتهود برضعه