الورشة

رْكبتْ النْهارْ
سرّجتُه باحْلامْ
وحْدي عارفْ
فينْ إيصُوطْ ريحْها
توحّشتْ الطْيورْ الْهاجْرة لوْكارْ
أُوناوي انْزورْ عُشْها
نْحُطْ راسي بينْ الرْيوسْ الطّايْرة
أونحْلمْ على قدْ خْيالي
فْ الوْطا لِّي قدّامي
خيّالْ...
شادْ لْجامِي
رجْلي فْ الرْكابْ
نْمهْمزْ مرّة … مرّة
عَوْدي الگُمري
ندْخلْ السُّربَة...
نسْبقْ الرِّيحْ...
نْعانقْ ريحْة الغُبرَة
نبْركْ على القرصْ
نشَمْ دخّانْ البارودْ
إطيرْ سرْبْ لحمامْ
من عُشْ الدماغْ
فيه نختارْ مْكانْ
ونحلّقْ فْ لَعْلا
سيرْ... ياعقْلي
سيرْ...
طيرْ... يا خاطْري
طيرْ...
بْلا ڤِيزا فْ السْما