الورشة

الشمس التي كانت تملأ الدنيا نورا وعلما وحظارة اليوم صابها الرمد
واصبحنا بدونها في ظلام حالك لانرى الا لمعان السيوف التي تذبح ابناء جلدتي
العراق شمسي

شمس رمده
....................

شفتك شمس رمده وبيها غبرة خيل
وصوت الريح يتلاوه برمش عينك
وشفتك جرح تزحف معتني أعله السيف
يتوچه أعله دمك حيل رجلينك
جثه بلا گبر والچفن ضحكة كيف
والجناز صرخه ومحد أيعينك
يا أول گبر يضحك بوجه الموت
بس راعي البخت شگ مذهبه ودينك
شگ مذهبنه بيك وصرنه بيك اثنين
حرگ تالي اليجي وعاد اعله عشرينك
يا اطول نهر ظيم بوجه متعوب
من تعطش فرح تشرب حزن طينك
چورت الليالي وشلت ناسك حيف
وانت بلايه حيف احترگت اسنينك
چم نظره بجفن خانگهه چفك طيف
وچم طيف اليمر خاطف حسن زينك
لامثل العواصم تبتسم بغداد
مغصوبه وتزفها اسيوفك وبينك
اشما وج الضحك بشفافك انطفيك
ومن چف اليعورك احنه لاوينك
شما يرگص ابليس انجر عليك اسيوف
وگام ترابك ايطفي بچوانينك

كلها اتحزمتلك وانت صدر احسين
شما تردس الخيل ايوج ضوه اسنينك
شما يمطر ثلجهم دمك ايدفيك
ومن اجروحك اتشيد صواوينك
من عز المطر واتكشخ النگاط
غرگَّت العرب من دم شرايينك
وشفتك من عطشنه وعظنه ضرس الموت
رحت بجودك وتتنخه چفينك
بس ماوصل حلگك والسهم لاگاك
مگبل ياعراق وشرعب ابعينك
يلصفنتك ظلمه ويگف بيها البوم
وتبّرد الضوه ابمكسر روازينك
چم شيطان مد خيطه ابفطر رجليك
وانت الماتشيلك حته رجلينك
شما مرك جدم الا اعله ظهرك داس
ياريل الهظم تعبت فراگينك
تچرم والرماح ابظهرك تلاكيك
يابخت العرب من هوسوا وينك
لاچف البگه وتتوچه حته اتگوم
ولا من هالعرب يفزعلك ايعينك