الورشة

صاحبي راجع
واحنا أحنا
الغياب في الأصل محنه ..
الغياب علمنا نوعي ..
نخطي ع الأزمات
ونسقط في القصيدة
مرّه جرحي
ومرّه صرعي ..
عمرنا الفايت بسرعه ..
زي شمعه
أستغلت أوضه ضلمه ..
وابتدت ويّا الحياه
رحله للتغيير
ودابت ليه بسرعه ؟!!
..........................
تفتكرني لمّا كان في زمان في قلبي
بنت غير بنات زمانها ..
كنت بسرق نفسي منكم
بس عينكم كات تجيبني ..
لأ ؛ يا صاحبي
اللي كان بيجبني تاني
هوه إحساسي بغيابكم ..
بعدها
إيه اللي صابكم ؟!!
ابتديتو تغيبو في المدن الكئيبه
تشتريكو الدنيا ؛ وتبعني ؛ وأصمد
كنت وحدي
بركب الأيام لغيمه
بارتكب نفس الجريمه
كنت فاهم ..
ولاّ مش فاهم سيان
كنت طير عيّان في عشه
قافل الأيام ؛ وخايف
من عرس عايزاني عشوه
من ألم أغتال لي نشوه
من زمان
من غيركو ضللني ؛ وغيّم
من
ومن
والغياب في القلب يطعن
عزله ديّة
واللا مكمن..
والا طعنه من مواعيدكو اللي خلصت ؟
كل حاجه قصادي رخصت
أصعب الأشياء يا صاحبي
جرح حرفي
كنت باغرق
والا باطفي
كنت بتسرسب في روحكم
كنت مش فاهم جروحكم
مع إنها في الأصل جرحي ..
صاحبي .. صاحبي
شمس تاني
وليله بتزوّق في روحها
دنيا خايلتني ؛ وانا
ما كنت طوعها ..
كنت باشبه
جابهه للرفض المحايد
كنت زي البحر شاهد
والحاجات بتضيع ؛ وقلبي
عمره متغيرش مني !!
أنسرق دلوقت سني
وانت راجع من مخاوفك
جي بتشقر علي نصب المغني
وقلبي آه
يا صاحبي لسه
لسه ما بطل يغني !!!