الورشة

مطروفه عينى بالنظر ع الناس
ممسوسه ايدى بالتراب البكر
طالع لي ديب من فكر انفاسي
خوفني خاف الزرع من فاسى
وانت المآمن يا وجع للايد
وانت يا خوفى ليه بقلب حديد ؟
مرغومه رجلى فى اختيار المر
*******
وادفّت البنت البنوت بيّا
البنت واقعه من تراب الأرض
ما كنت يوم فى عرفها زانى
كان جسمها مولود لأحزانى
وانا اللى سارق ضحكتين منها
عايزنّى آكل بالتمن وشّى
والصوت مضايق لهجة القاضى
والحكم للى ينجرح دبحه
والحكم للي ينجرح يذبح
*******
مكتوب عليّا فى السنين أفرح
مكتوب عليّا فى السنين أضحك
مكتوب عليّا فى السنين مكتوب
--غنّيت لساعه من فرح ما لقيت
غنّيت لساعه من بكا حنّيت
يا قلب يا محتار تروح النار وتدّفّى
ولا تروح النار تنحرق بيها ؟
البرد قطّع مهجتك فرقها فوق داره
وادّى صكوك الدّفا للكلب والنسناس
يا حبّنا الغلبان
قطّر بشاير ندهتك جوا العيون ضحكه
واملا خزاينك قمر وادّينى اوصافه
خليني اشبع سهر واتغطى بلّحافه
---------------
اصل الليالى القديمه مليانه درابكا
اصل--
الليالى--
القديمه--
مليانه---
درا ب ك ااااااااااا

***************