الورشة

طْويّر الخاطر
يا طويّر خاطري
هجرتي غْصاني
نْسيتي العشْرة
خليّتي الحسْرة ف اعْماقي
شْداك فْ عْروقي يسْري
شقْشقْ و طيرْ
بين اوراقي
ريشك على اوتاري
يضربْ نُوتات
يلمس لمْسات
يدغْدغْ اشْواقي
بْنقرات منْقارك
تبْرى علْتي
آجيني ف الحين
فيك ترياقي
ازْهاري فاكْية
تناديك
مصْ رْحيقْها
رطّب لسانك
سمّعني لحنك الرّاقي
ف جْبال ذاتي
صْدى انغامك يهب
ريح شافية
تريّح رْفيع ادْواقي
يا طوير الخاطر
حطْ ف كفْ يدّي
قْْرا فالي
بْريشك مْسح خْطُوط
شقاي و ما نْعاني
لا تْعاود تهْجرني
ف الحيرة تخلي رُوحي
تشْوى بْنار لجْفا
ما نعْرف غيرك طويّر
مزوق
لْوانُو تفرّح العين
تمْسح الغُمة
رفرف بجْناحك
جيني ف صيفة هبّة جنّة
علْ لخدُود تبرّد اللْظى
سرّح عْروق لفْراح
طوي ذاتي طيْ لحْبيب
هزْها رزْمة
لبْعيد خْطفها
مْعاك تهْنى
تْعيش ف ظلك
ب فتات القُوت
ما تجُوع ما تجيها مُوت
شوفتك رْوا وعوْلة
لعرُوقها النّاشفة
ف جرْدة لهْجر
وفُوت الفُوت
سمّيها من جْديد بخاطرك
يا طوير الخاطر
ناديها تجيك شبيك لبيك
ملكة فوق راسك
حطها بديك
انت سيدها و هي تاجك
راضيها باحْلام انت راويها
بسْفر ف مُوجة لعْمرالباقي
واعدْها و دّيها
بيع عقلك و هْناك عليها
راها ابْغاتك
غير ابْغيها
لا حد غيرك
لايق بها .