الورشة

عشْق الوطن
لعْروسة...
نمْشط سْوالفك...
فيها نزرع التمر.
نحنيّ ليك...
وْراك نمشي مْخنترْ.
لبْسك قفطان من لحْرير...
نفديك بالعمر.
لالّة... ! أنا خْديمك...
أمُولاة لحْمرو لخْضر.
اكثر من نفسي نبغيك...
ما تعدْريني...
حتى ندخل لقبرْ .
أنا خوُيا التوبقال
أم الربيع
الأطلس الكبيرو المتوسط
و الأصغرْ...
فيك شلة ودان تجْري...
ميّاه تهرْهرْ.
سْواحلك زرقا...
طويلة...
بْحرْ احْدֿ بْحرْ.
آشْ نْكون من غيرك ؟
واحدْ تايهْ مْودّرْ...
عايْفاه الدّنيا...
هازْ رْحيلوُ على الدْوامْ ...
تالفْ بْلا وكرْ.
شمّيتك ... ألالّة...
فْ وردْ مگونة...
نعْناعْ مكناسْ...
فْ تازة أتايْ بالزْهرْ.
سمعتك عيْطات ...
شلْحة وعرْبيّة
مْعانگة ومْلوْنة...
تصفيّ الخاطرْ.
دگتك گصْعات سْخونة...
من كل جهة...
فواكه لذيذة فْبرْكان...
عْسل سُوسْ بالزّعترْ...
فالغرْب سكّر الشمندر.
شفتك أرض خضرا...
مْزوّقها بلّعمان...
وجوه زينة ضاحْكة...
تصْرف سْخيّة...
ما تعْرفْ شرْ.
لمستك ونَا صبي...
فْ حْليبك رْضعتكْ...
ترابْ
ماء
هْوا
شمْس ...
شْحال قدْني ليك نشكرْ.