الورشة

على قهوة قلبك

وأنت مربـــّع إيديك

وممدد روحك فوق منك

وبتهتف (لأه)

بعلو الصوت

مالمحتش شجر التوت

رافض يحبل بالتوت

مالمحتش قطر الموت بيئنّ

ما قامتش فـ راسك

فكره تخلّى عنيها تحن

ولا فكره تخلّى الناس تتجن ؟

ولا فكره تقلّب

كل ضحايا الفن الراقى ف قاع فنجان ؟

ولا داس جوّا عروقك فنان مشتاق للضىّ ؟

على قهوة قلبك

وأنت مربـــّع إيديك

وممدّد روحك فوق منّك

وعنيك عمــّالة بتتمقّق فى بنات الحى

ما شربتش ويــّا حبيبتك شى ّ

و غنــّيتوا (لسيد وامام)؟

ما مسكتش ايدها ؟

ما حاولتش تلمس شفايفها بريشة رسام ؟

ولا بصـّيت ويـّاها لقدام ع المستقبل ؟

ولا نطـّيت بتمرّد (ف) عنيها

تشوف الصبح بيطلع فين ؟

ما عر فتش باب جنتها منين ؟

ما حاولتش

تضغط على جسمك وأنت معاها ؟

ما حاولتش تسرق من جواها غناوى النور

وملاك الريح

عمال بيزيح فى حيطان الدور

والجو مهيئ ع الدكه

وعنيك عمالة بتنزف شر

والحر ملهلب ع السكّه

والناس بتدوّر على فكّة ستّاشر ساغ ؟

على قهوة قلبك وأنت مربع إيديك

وممدد روحك فوق منك

وركابك عمّالة تخبّط م الخوف والبرد

ما قريتش اسمك على كارت نضيف

كان واقف يحرس حزمة ورد ؟

ولا فاتت بنت ف ريح منك

واخده الشارع بالطول والعرض

ولا حدّش حط ف راسك (فرد)

وقال لك قوم ؟

ما حاولتش لحظة تدوس ع الخوف

وأنت بتتشاقى ف أوضة النوم ؟

وأنت بتضغط

بإيديك على وش الكوميدينو

وبتنزف همّك بين لدراج ؟

وأنت بتقرا (ف) وجع (الحلاج) وبتتقطّع

وأنت بتتمطّع وكإنك قرص بلازما ؟

ما قريتش ملامحك فى مرايتك

من غير جزمه ومن غير ببيون ؟

الكون مجنون وإنت مخاوى

قلبك (براوى وسحراوى)

ومحتاج تصليح

محتاج (ثورة تصحيح) تانيه

محتاج تقرا الدنيا بترتيب الحبّيبه

محتاج يطلع مليون خيبه

علشان العالم يعمل لك

وسط المهابيل شنّه وهيبه

ويحطّك وسط الناس الهاى

الناس الفاهمه الدنيا ازاى ومنين وامتى

تعرف لو كنت طاطيت راسك

مش ممكن كنت هتبقى انت

ولا كنت هتبقى الأخ النازل

فوق من راس الست بنات

ولا كنت هتزعل

لمّا الخلق تقول فى ودانك

(بيرم) مات

ولا كنت هتلبد

فى طلمبات المكن الساكت وتعيّط

وتخيّط أوجاعك بشويش

وتجهز نفسك للخفافيش السعرانه

قلبك مش حتة رمانه

قلبك دانه

قلبك فدان مليان شواكيش

قلبك تورتايه ولقمة عيش

على حتة جبنه قريش ناعمه

جهز نفسك علشان بكره

هتكون عكاز والدى الأعمى