الورشة

مقطع من القصيدة المطولة "غابة البكام " و في نفس الوقت هو العنوان الذي وسمت به ديواني الزجلي الذي صدر سنة 2000

ذابت الكلمة فالذات
لغميز عـّوض الكلام
الحرف غراق فالسهات
الاشارة هزات لعلام
اللسان سمان بالسكات
من شحمه صنعنا يدام
ظلمة على النور طغات
بلا سرج الجمنا لجام
علة فالقلب سكنات
ما يداويوهاش لبكام
يا سيادنا يا الروات
هزو بنا لعلام

غنيو فطيبة الزهو
سليو القلب الساهد
رشو للمصروع وجه
بسبول الليل الشارد
اصعق من طشاش نبهو
اسقيوه عصير عناقد
عاشق لطيبة الزهو
عاشق يعيش راقد
لغرام يعمر منزهو
يفرش في ركانه معابد

د/ الثوب واش يواتينا؟
اخشين ما ليه ألوان
كيفاش يمكن يرضينا ؟
نزوقوه بريشة العميان
لبسته تحلى فعينينا
تطيب الكعدة وتزيان
من الداء دوا يداوينا
قالوها لينا العديان
الفلس عزيز علينا
معبودنا وحاكم الزمان
من غيرو شكون يبغينا
لا احباب لا اصحاب لا جيران

علة فالقلب تنخصني
إذا شفت ذات رزينة
خليوني امغمض عيني
شوفة فالحقيقة غبينة
صيفة النعامة تنعمني
نغطس راسي فرملة سخينة
نفرش ريشها يدفيني
من جريحة الايام الصنينة

أشنو ذنب المهبول
إذا اخفى ضره من الناس
رتق مخارج القول
صك عليها الادراس
بلا طبيلة بلا طبول
حضرتو تهزهز الراس
إذا انطق بكلام مغزول
لخيوطه ألف رأس
ينسج في دراز المثول
مرامه ما عليها عساس
خراق يلبسوها الفحول
صوفية تدفي الانفاس