الورشة

عايزنى أكتب شعر تضحك
كل ماتقراه وفمك ..
ينفتح زى انفتاح وطنى وبلدك
ماشى هاكتب .. عندى طلبك
عايزنى اقول لك نكتتين ياخدو بخاطرك
يصبروك على حِمل همك ..
ينعنشوك ساعةْ اصطباحتك
يسطلوك ويغيبوك عن كل وعيك
قبل ماتروَّح لبيتك .. سهل جداً راح أقول لك
خد دى عندك ..
***
مره واحد حط إيده جوا جيبه
التقى فاره بتولد قال دا عيبه
ليه ما جاش طلقك يافالـحـه
قبـل مـا اخـرج الـنهـارده
أألـو كـان إبنـى هـايـلـقى
أى حـاجـه ليـهـا مـعـنى
يشترى بيها كتابه !!!
****
لسَّه مش لاقى دى ضحكه ؟
اللى فاتت نكته بايخه ؟
عامله زى احوال بلدنا
ماشيه تعرج راسها مايله
زى نوبةْ فرخه دايخه
والديوك بينقروها يشدوا ريشها
لجل مايعَروا جناحها ..
لجل مايعِروا تاريخها
قال وناقصه ..
القطط جَـيَّه كمان تشرب ف بيضها
وضع طعمه فى حلوقنا
كوسه بايته باميه شايخه
وعشان عيونك خد دى عنى
نكته تانيه .. برده بايخه
****
أنا كنت قاعد ببتسم لـ ابنى
يضحك لى سِنُّه.. عمرى يضحك لى
بصيت لقيت ع الشاشه من وطنى
إنسان بسيط واقف يقول إبنى
ركزت شوفى طَرطَقِت ودنى
فاكره بينده .. ع الولد علِّى
سقف البنا خَضَّر قلوب أرضى
لقيته واقف فوق جبل صخرى
بإيديه بينبش فيه وبيقول لى
أنا والوجود يامين يساعدنى
هنا تحت الجبل إبنى !
هنا تحت الجبل إبنى !
وده قلمه وكراسُه
وده إسمه على كتابُه
ودى شنطة أمل بنتى
معاهم تحت فيه طفله ..
على حجر امها جالسه ..
عارفها من نخاع صلبى
يدوب كانت بَدَت تحبى
وتحت الردم ده .. أمى
عجوزه خاصمت الضحكه
وشالت هم جوع عمرى
ساعتـهـا مُـت فى نفـسى
ماعـرفتش أبتسم لـ ابنى
تانى لأَنى .. مابيدى ..
أحنى جبهتى وضهرى
واشيل حفنةْ تراب وارمى
غـبارهـا ف وش تغريبتى
*****
قالوا كلام مَفهمتوش !.. مايهمنيش فهمه
داب الجبل ولا اندهش من منظره وحِمله
حاول يشيل قدمه ويرحل وهن ماكملشى
قرر يقع لما كفر .. بالعلم وبنفسه
قام انتحر وماخدش بالُه ان البشر تحته
تلبيكه دى تشبه وطن عندُه ارتباك معوى
مركز بحوث الأرض وأنيميا الجبال يحشى
تقارير كتير أقراها .. أفهم ! .. ماهافمشى
مابفهمشى ..!
دماغى عدس وفول وكام صباع محشى
وعيال بتلعب كوره شراب دايماً بدون إذنى
فى خُن روحى الضيقه وداخل حارات مخى
يعنى ( كده بصره ) وتغلبنى
إضحك ياسارق قدسى من عينى
ماعادش عندك مشكله تانى
"بحر البقر" بصنعها انا بيدَِى
وبَعيد حوادث ياما ألمتنى
......... .......... .......
خلاص مش قادره يابلدى
تحمينا من صخره .. !؟
وده يعنى .. كلام يعقله عقلى ؟
..... .... .....
طب كنتى حتى انقلينا بالقوه
ماهى كل حاجه فيكى بالقوه
وانا طول العمر برده بالقوه
شايل الحمل فوق ضهرى
ويعنى ..
عشان ما ابكيش على إبنى ..
لازم أكون ويكون خارج حدود وطنى !؟
*****
لساك عايزنى أقول لك شعر تضحك
واضحك معاك ونقوم وننسى قلنا أيه
لساك عايزنى أتريق على جرحى جرحك
وليل وطن زاغت عينيه
على بنت حلت شعرها واتحزمت وقالت له هيه
صقف لى وسطى قايده نار الرعشه فيه
صقف لها .. واما انسطل من هزها
دبِّت صوابع غدرها ف ننين عينيه
!!!!!!!!!!!!!!!!!!!!!!
****
مين قال ان النكت ياصاحبى خطوه فوق درب المحال
مين قال ان النكت هاتجيب حريتى وقوت العيال
مين قال ان الشعوب دى كلها قامت ع التريقه
على نفسها .. أو حتى قامت ع العويل
الشعوب دى واجهت نفسها بالمشكلة
من غير نكت .. من غير عويل
حذفو من لغة التعب .. لفظ إسمه المستحيل
كشروا خمسين سنه ..
بس ضحكو فى آخر الدرب الطويل
واحنا لسه زى ما احنا ..
قدام شاشات الخمره ف كل ليله نضحك لـ " اسماعيل "
ونشاهد " الف ليله وليله " ونمشط ف ديل
فرس الأمير ف خرافة كات من ألف جيل
بينيموا بيها العيال
وغيرنا رامح بالفرس واحنا لابسين اللجام
مين قال ان الحكومات هى صُناع الشعوب ؟
اللى اعرفه إن الشعوب هى صُناع كل شئ
الشعوب ياصاحبى هى مفازة التكوين
ريح بتعصف باللئام
****
خد منى آخر نكته قبل ماتشد اللحاف وتقول سلام
هاحلم بنكتةْ بكره وبهم العيال
ولا أقول لك .. مش هاقول
قوم ننام
والصباح وضَّاح يمكن يكون
الشروق جايب معاه قمح الحمام
تصبح بخير !
تصبح بخير !