الورشة

وصـــال

ولسه طعم ابتسامتها
ف عيونه
ورعشة وسطها ف ايديه
ورطوبة الجدران
نشعها غرق ويا دموعهم
أرضية بير السلم

.
حــرب

ولد
ما بيحبش من الكوتشينه
غير البنت
وهوا بيكره الشايب
بيبص ف عنيها
يخطفها م البرواز

.
سكـة

هيه اللى وقعتنى ف غلط
سحبتنى من ايدى
قفلت عنيها عليا
وقالتلى استغفر

.
بحـــر

ما تعيطيش بالشكل ده
مش حأقولك ايه حصل
ولا حأطبطب عليكى
وطبيعى مش حأخدك ف حضنى
عشان ما أغرقش ف دموعك

.
معاكسـة

بنت
وجميله اوى
مين حيسلك خدودها
من عركة المكياج
ويحطها ف صوره
تخطف عنيه منُه

.
واحـــد

ماكانش قصدى
أحضنك خالص
ولا أدوبك فيّا
كان كل قصدى
ما يشوفوش
اتنين

.
سفـر

طير مطرود من رحمة طير
وورده وحيد ف ارض شوك
وشجر مسكون بأحزانك
وحزن سكن ناس
وناس ساكناك بالعشم
وحاجات ماهيش منك
ألا قوللى
مين مشاك
عريان ف الشارع

.
عجـاج

من بعيد شاورت له
ما تجيب عشره جنيه
وأديلك حاجه
قالها
هوه الموضوع العشره جنيه
ولا الحاجه
قالت محتاجه
قالّلها
خدى العشره جنيه
مش عايز حاجه

.
طريـق

كل اللى يعرفونى
ما شافوش قلبى
كل اللى شافوه
ما أعرفهمش
كل اللى راكبين القطر
مش شايفين القضبان


نـُص حركــة

بصّتله سبّل لها
بصّللها سبّتلُه

.
رُبع جنيـه محروم

ببساطه كده
أصله كان بيفرقع
ف ألاربع جنيهات المخرومه
ويسدد ديون المحتاجين
ببساطه كده
أصله كان
لمْ الجعانين
وعملّهم عزومه
ع المزاج والطلب
ببساطه كده
لم كل الاحبه
عملهم بيوت بضل ونخيل
ببساطه
كتروا الجعانين
زادوا المحتاجين
ببساطه كده
طلعهم برّاه
قفل حلمه عليه ونام

.
مسافـة

من يامه أوى
ف البعد
انا اللى قابلتنى
ولا خدتِّنيش بالحضن
بصتللى من فوقى لتحت
وسيبتنى ومشيِت.