الورشة

لحْبيبة امّي
جيتك فْ ليل حالكْ
خاطْري خاسر...
اجْناحي مْكسّرْ.
حْبيتْ عْلى هْمومي
فْ اجْلالي مْعتّرْ.
ضمّيتني بين احْضانكْ ...
على دراعك ...
حطّيت راسي...
ثقيل مْعمّرْ.
ما طْرحتي سُؤال
يكفيك جيتك
قاصدْ دْواي ...
انت لمْحنّة و الصْبرْ.
منْ ايّام كنْت درّي طايش
غارق ف غرايب الصْغُر
علّمتيني لا بُدّ نْجيك
بيك نتْعالج و نجْبرْ .
ساكناني على الدْوام
للحزّة مْخلّيك ك الدّرهم...
نحْتاجك فْ ايّام لقْهرْ.
من حْليبك ...
ساسي بْنيتُو طُوبة طُوبة...
راهْ منْ زْمان...
صامد...
ما تْكسّرْ.
علّيتْ راسي برْضاكْ...
بلا جْناحك...
ما نقدرْ نْزيد لقدام
طْريقك سالكة
مْفرْشة بالزْهرْ.
زْمان غبت بْعيد ف شْبابي
تهْت بين شهْواتْ
ما ليها لذّة...
ما ليها قْدرْ.
طفت ف غْيُوم اسْما
ما تمْطر ماء و لا اهْنا
رْجعت لصْفا
لْقيتك گاعدة
تْعايْنيني ف الوْكرْ.
صُورتك وحْدها ضاوية
فْ ظلمة ذاتي الحايرة
معلقة ف بابها
عليّ ساهْرة
طُول لعْمرْ .

---

الميلودي العياشي
في تيفلت ليلة 06/03/2008