الورشة

لمْريرة

هانا
دايزْ من هْنا
جارْ اقْدامي
بها نرْسم أترْ
يمكن مْع الوقت
يْغطّيه الرّيح
بالرّملة
يمكن يصبر للبرد و الشتا
يولّي طريق
لناسْ
عادْ يتولْدو غدّا
أنا تايقْ ف لحْمل
المهزوز علْ لَكتافْ
يْزيد يعمّق ف الطّين العَفْطة
يغْرس عْروقْ رجْلي
فْ كلْ خَطوة

صْباعي حفْيانة
مدْبُورة
بالدّمْ مْحنْية
عل الصْخر تنْقشْ
بْعرق الطريقْ
ليّامي صُورة
فْ كُل مْحطة

لوطا ...
قُدّامي
يطوي سْنين
عْليه نْسجّل شْواهدْ رْحيلي
مْساربْ عْلى ورقة

عْلى بابْ كُل نْهار
خْرجت منّه
علقت فاكْية جْديدة
مْع السْنين
تنْشف
تغوِى
غلّة جافّة تْولّي
لْديدة
عولة لسايْحين
باحْتينْ
فْ أرض مْديدة

فْ كل تلْفيتة
لْطريق
كْليتها فْ غفلة
نْعاودْ الوقفة
نحْسب وراقْ صفْْرة
مازالت فْ عْروش
معلْقة بنتْفة
واخْرى عل الارض
رْشَاتْ
مْفرْشَة
مابْقى منها غِيرْ خْيوط ْ
هَيكَل
على شْكَل شَبْكَة

نتحزّم بيدّي و لْساني
نعضْ بحْلامي
باكْثر من جهدي
عل نْهاريْطلعْ
يْجيني
يْكون ديالي
نفصْله لوحات
تحضن خيالي
تجمع تخمامي
نعوّض بيه شحال
من يوم مات
طيّح مني حجْرة
ومْشى

هانا من كذْبة لعْمر
لَمْسرْسبْ
من خيط الزمان
فقتْ
ضربت الفَقدة
ف التريكة
لُوحي خْفيفْ
شْحال من سْطر
خلّيت
شحال من كلمة
حْكرتْ
ورميتْ
بلهتوفْ
فْ نْهاري
تدْهيت
نسيت أني بنادم
قُوْتي
فْ تبدالْ زاوية
الشُُّوفة
تْعنّقني عيشة ثانية
تراري بيّ
تخنتني
نْعيف اللّولى
نْشبّر بظْفاري
ف الدنيا الجْديدة

كنت نْكون
اكْثرمن نزوة
نعرف عْلاش أنا هْنا
ما نْمشي فْ ظل
مْضرقني قبْ الحشمة
نخْشي صْباعي
فْ الجْمر
نتّكْوى
نبْرى من الحُركة
نكبر واقف مْجرّد نخلة
نبني قبّة
ليِّ تكون قبلة
يْتشبّه الشجر
بعْروشي
يقلّدني ف المشْية
يْتّصْبغْ بْلوني
يْحطني بين عيْنيه
فاكية
من ديك الجنّة

عْصيت شْهوتي
ولدتك
يا أنا
يا راسْ حارنْ
فُوق هادْ الكسْدة
ما هولني سُوق حامي
فيه الناس تتْزايدْ
عل البرزة
ما عشقت سلعة
قاطعة لبْحور
منها لعباد تغرف
تتْلدّد
بكشْكوشْة النعمة

حطّيت الجسدة علْ لفراش
نهمّد الحُرقة
فاق النعاس من القلبة
جا عند راسي
يحْكي غْرايبْ النهار
يْفكرني فْ وسْواس
لابسْني من يوم
وْعيت باللّعْبة
بْمسامر المكينة الدّايْرة
تزرع الغفلة
تحصد نوّار لقنادل
الشاعلة ف دروب الظلمة
تْقطَّر باللّيقة
طوِيبات السّكرْ
وْدُغماتْ الكَسْرةْ