الورشة

الى اجمل امرأه الى التي كان طعمها احلى من السكر
واعطر من الياسمين

...............
خمشت برمش عينك كل ظلام الليل
ولميت السواد بمغرف اعيونك

ودگيت النجوم بهاون الصفنات
واتشظت وصارت لمعة بسنونك

من تخجل تبوگ من الاصيل اللون.
وبخدودك تلم الاحمر ولونك

يافص الشكر والروح مره اعليك
وانت شگد حلو واهلك يحلونك

خطفت اللون الازرگ من وجه الروجات
وغده ناحل الماي وباگته اعيونك

ظلام الليل مهره ومگبلك نسمات.
من تهذب شعر يلعب عله امتونك

عله اوصافك تذابح بالسيوف الطيف.
والوان القصيده اتماطلت دونك

زعل لون الخضار الخاوه ورگ التين...
من شاف الخضار انحط عله اجفونك

يكل نگلة جدم تشتمك انت الكاع
يابگجة ورد خافن يشمونك

عنبر يلشتالك يلعب اعله الماي
يلشتلك شچخ موطش يطشونك

اجن چني الملوح من تحاچي الناس
واشد عينك حرز بس لا يحسدونك

يامجنون روحي وانت هم مجنون
خل تلعب عرايه اجنوني وجنونك

ابوگلك ضحچ من شفة العذال
وابچيهم الك وافرهلك اسنونك

حسبت احساب هم رسام ارسمك
عود وانت اللوفر وشيلاوح افنونك

لَّون فزعة رسم دافنشي يفزع
ليك وفنانين عصره مايرسمونك

شنهي المونليزا وانت شبة نار
من ترفع احجاجك تحترگ دونك