الورشة

امبارح

مع دقّة أول ساعة فـ ليل الغربة

حسّيت إن إنتى معايا بكل كيانك

وعيدانك
عمّالة تفرّع فوق أكر
الشبابيك واللبواب

وعيونك
زى الكلمة الحايرة فـ
كل كتاب
وضفايرك نعسانة بتحلم
فـ سنان المشط اللى بيلعب ع السرّاحة
وشيلانك بالرّاحة بترقص
على كتف الشمّاعة السهرانة فـ كل دولاب
والشوق بيحاصر جسمى من الراس للقبقاب
لشباب القلب
النازل سلم جتة طويلة عريضة بيتمايل
ويحسس على شعرى المايل تحت طاقيتى
وايديكى معلّمة فوق جدران
الشقّة المفروشة بسجاد لونه نبيتى
وشفايفك فى ودانى بتهمس بكلام بيتى
وأنتى بترقينى بعود القش
وبتسمـّى
ودايرة تلمى الحطبات والشوك من قدامى
من عينى ومن عين اللى شافوك
من عين كل شريف وحرامى
من عين الواد الواقف على راس الحارة
والجارة الدّون
والبنت الحبّيبة الواقفة لك فى البلكون
من عين عفاريت الشيخ مأمون طبّال الزار
من عين حراس باب الجنة ووطاويط النار
من عين الزوّار اللى بتيجى
لسيدى هريدى فـ نص الليل
من عين القنديل المكسور
وخيوط النور
وجناح العصفرة والدبور
والأرض البور
والنخلة الطالعة فـ ريح السور
والواد مندور اللى بيضحك لك فى البرواز
وبابور الجاز
وقزاز الدار
وتيران العمدة وشيخ الحى ونسوانه
وكلب الدوّار
وحمار العربية الكارّو ..... يكفيك شرّه
النبى يكفيك شر الحسّاد
وبلاد الخلق اللى بتاكل بالليل ناسها
من عين ريسها وكنّاسها
ربنا يكفيك شر فلوسها اللى بتيجى حرام
بسلام الواد التايه فى الصحرا لقيتك
وبحكم السن وملك الجن
رقيتك مـ الوجع المحزون واسترقيتك
وسقيتك من صدر النجمات بحليب صابح
ربنا يجعل خيلك رابح
ويقوّى عزيمتك فى طريقك
ويبلل ريقك
من بير الفرح المتدارى فى حضن الأيام
وتضمى خيالى الداير يسبقنى لقدّام
وأنا ماشى بحسّك فى الميادين
وبحس بطيفك فى المطبخ
على كل صينية وكل برام
مع أى كلام يتقال فى الحب
من الشعرا القاعدين ساكتين
مع أجمل حاجة ( لفايزة أحمد )
مع لحن ( بليغ ) و ( السنباطى )
مع شعر (فؤاد حداد ) و ( جاهين )
و ( الأبنودى ) فـ ( جوابات فاطنة وعم حراجى )
والسنّة الفضّة اللى بتحضن ضرسى العاجى
فى ( عاشور الناجى )
وورد بلدنا الطارح منّيه والمقطوف
وقميصى المنشور جنب من التلفيعة الصوف
وبشم عيونك لمّا الصبح
يدوس ع الناس برذاذ الخوف
ويزوّد عمر الواحد يوم
كان قاعد جنب بريد الحلم بيستناه
وتدورى تلمى الرزق المتنتور وحدك
فى اجران **الله**
وأنا قاعد جنب بريد الحلم وبتبصص
على بكرة الجاى
والعمر بيلعب على قورتك وبيشرب شاى
وأنا ماش ليمّة فين وازاى ؟
ولا جه فـ بالى
لكنى بحسك
لما بضم ايشارباتك من ع الكنبات
لما بشم هدومك ريح من كرسى التليفزيون
فى شوال الغلة وكيلة الرز
وقفص الحمامات البيتى
فى حيطان الشقة وريحة التوم وفـ أى هدوم لونها نبيتى
وبحسك جنة فـ حواديتى فـ طعم الأيام
فى شريط السهريّة الوالع ..
... وأنا طالع وياكى لقدام
وبشوفك أحلى فتاة أحلام وأنا متضايق
والكون مش فاض ومش رايق
وبحسك وأنا مخنوق ورداية
وأحسك بستان وأنا فايق
وأنا سايق غنمات أوجاعى
لحويطة براح وزمن خالى
وأنتى بتدعيلى بصوت عالى
وبحسك وبتيجى فـ بالى
لحظة ما بشوف كباية الشاى فـ ايدين عواد
والبنت سعاد اللى بتحجل
والمنجل والعمّة البيضة
والزارعة الطالعة بتتعاجب
فى احواض أبو مؤمن وصميدة
والفرحة المالية وشوش الناس
ما علشّ أنا طوّلت عليكى
بس بجد مجرد احساس