الورشة

زاعتنه الشواطي وذبح روحه الطين
مو شرعي العشك والگاع بي حبله
والماي الصفه من الروج حدره الخوف
من العار مات وبلعته الدهله
شما مر النسيم اتجرنه صفنة موت
شرب دخان دمنه وخنگته الذله
خبط كلشي وتنجس واليكر الماي
 دم خنزير والمذبوح شيغسله
كف ثوبه النجس واتيمم من الريح
 وطبع الريح كل مذبوح تندله
طبعنه شما نضمها ايّبين المظموم
من يعرك جلدنه اتبين الخله
شال الحيف روحه وركظ بيها العار
وكرهتنه الليالي وركصت ام كذله
تغازلنه السيوف ونضحكلهه اركاب
 ويّذل الجرح يوم التغازله
الضحج بعيونّه امكمط نلاعب بيه
طفل وابليس هز راسك يغازله
غريبه اطوارنه وكل طور الف من طور
 اذا واحد ثبت رجليه تزاغلله
نبچي بكل عرس ونهلهل بعاشور
والطاح اعله حظن احسين نكفله
حكهه الكاع من تطلك تصيح الغوث
 سجاجين ابطنهه وكل نصل طفله
ولو يسر حملها وصدك راح تجيب
 ميت يوكع وبالعار تغسله
من يابشر ذوله ومايهزهه الموت
وحته الموت صرنه اليوم نكفله
اثنعش كوكب ضوانه وماتعرف انشوف
چا بالظلمه هسه تريد تندله