الورشة

لم يبقى من الصبر صبرا

گصيبه وحنه ومرايه
وقصيده وسيف وحچايه
وشفايف نثيه بالعشرين بز
بيهه الحليب وترجف اهوايه
عاصرهه العشگ شهوه بحلگ تنور
وج بيهه الغزل والگذله فختايه
وشلهت بيه روحي وكفر بيه الزود
وعيون الجروف تبوگ ممشايه
كل وصله بجرف وعيوني تشرب طيب
وروحي بديره تبچي وماكو لهايه
اگطر مستحه واچهب ادگ بالباب
ومفاتيحك تموع بچف الاولايه
چنت برمة گصيبه اعله الصدر ممطول
واتباهه اعله كلمن يحچي بمرايه
امشط بالسعف واغسل بوجه الطين
واضحك بالدموع وتبچي ملايه
افوح بريحتك من يشتهيني الليل
واصيرللك مضيف وهيل وحچايه
اعله لحظه وغافلتني الريح من رديت
شالتني وخذتني الابعد اولايه
تركتك من تركتك گمت بس اهدوم
بس روحي البگت ما الهه شرايه
اختنگ صبري وگمت اتماطل اويالريح
مثل الشط وگف ويهوس ابمايه
وغص بيه الحنين وزعت كل الشوگ
صفنة كربله وتنوح فختايه
وحدي وسيف واحد والمهر لكاز
وكل بيت ابقصيده يرفرف ابرايه
وحدي ودمعه وحده والرموش افياي
احترك جلد الشعر للماش افيايه
وحدي وكلب واحد والدرع مشگوگ
والمنحر يصيح وماكو رمايه
باگو ثوبي مني وعلكوه اشبيح
وشتلبس حبيبي وثوبي دمايه
حگهه الخوصه تتباهه بوجه طليع
تخمش كل خضاره وتكسر افيايه
وحگهه اتواكح اليتشلبه عالجريد
بس تبلع عمرهه اتصير سلايه
صار الماي يرضع والثدايه احلوگ
وكل جرح بحلگ ويريد لهايه